Menntaklif – þekkingartorg skóla, félaga og stofnana í Garðabæ
Menntaklif er vettvangur fyrir þróun og miðlun þekkingar og reynslu þvert á skóla, skólastig, félög og stofnanir í Garðabæ. Haustið 2012 stofnuðu grunnskólar í Garðabæ, fræðslu- og menningarsvið Garðabæjar og Klifið vettvanginn, og frá skólaárinu 2013 hefur hlutverk hans náð til allra stofnana og félaga í bænum sem starfa með börnum og ungmennum. Hugmyndafræðin byggir meðal annars á VAXA starfsþróunarlíkaninu, hugmyndum um lærdómssamfélög og klasahugmyndafræðinni.
Stærsta verkefni Menntaklifs er Velferð barna í Garðabæ, sem stuðlar að samvinnu skólastofnana, íþrótta- og tómstundafélaga um heildstæða stefnu er varðar jafnrétti, kynheilbrigði og velferð barna. Verkefnið skiptist í þrjá meginþætti: verklag, fræðsluyfirlit og námskeið.
Verklag vegna gruns um ofbeldi, vanrækslu eða áhættuhegðun barna er samræmt fyrir alla þá sem starfa með börnum upp að 18 ára aldri, hvort sem er í leikskóla, grunnskóla, fyrstu bekkjum framhaldsskóla, félagsmiðstöð eða félagi. Hver stofnun og hvert félag aðlagar verklagið að sínu starfi, svo viðbrögðin verði þau sömu hver sem tekur eftir vandanum.
Fræðsluyfirlitið nær yfir hugtökin ofbeldi, kynjafræði, jafnrétti og kynheilbrigði á víðtækan hátt og er ætlað börnum, ungmennum, starfsfólki og foreldrum. Það nýtist sem verkfæri til þess að samþætta málefnin í námskrám leik-, grunn- og framhaldsskóla, félagsmiðstöðva og félaga. Með hverju efni fylgja upplýsingar um útgefanda, fyrir hverja efnið er, vefslóðir og lykilhugtök.
Reglulega eru haldin námskeið fyrir starfsfólk. Námskeið A fjallar um skyldur þeirra sem starfa með börnum og hvert leita skuli þegar grunur vaknar um vanrækslu, ofbeldi eða áhættuhegðun. Námskeið B fjallar um jafnrétti, kynheilbrigði og sjálfsmynd.
Á vefnum má einnig kynna sér grunnþætti menntunar og innleiðingu aðalnámskrár í grunnskólum Garðabæjar, styrki og sjóði sem sækja má um til menntamála og nánari upplýsingar um Menntaklif, markmið þess og verkefni.
